多得美股急升，港股昨日亦裂口高開，而且一路升到尾，睇波睇到殘嘅小初，精神亦為之一振，尤其係見到持有嘅倉底貨收復唔少失地，就算明知可能係短暫反彈，亦滿心歡喜。
其中一隻跟隨大市急彈的股份係北泰創業（2339），隻股將在6月22日，即係下周四公布全年業績，市場有共識，估佢盈利有3.42億元人民幣，增長大約25％左右。
北泰生意以出口美國為主，如果美國經濟放緩，理論上佢亦會受影響，但經紀黃就唔係咁睇，佢話北泰不斷改善產品結構，提高毛利率，另外又喺內地生產高毛利率的懸掛系統，發展埋內銷市場。
低過配股價頗多
此外，北泰喺4月底大旺市時批股，集資咗幾億銀，家陣水頭充足，況且股價在近期跌咗唔少，𠵱家上車估計風險有限。
北泰昨日升8.4％，收2.90元，成交636萬元。現價仍低過上次配股價3.625元頗多。
慕容小初