睇咗多場直播賽事，發現幾支賽前被一致睇高嘅球隊，喺首輪比賽多數未盡全力；面對實力較低嘅對手大多數敷衍了事。以戰略部署角度睇，球隊留力無可厚非，但作為球迷，以至投注者而言，此舉無疑係「揸流攤」，同打假波冇乜分別。
猶幸仍有球隊以真誠對待球賽，全力以赴絕不欺場！當中以03年歐洲足球先生尼維特領軍的捷克隊最能予人驚喜。觀乎該隊首場迎戰實力一般嘅美國隊時，球員場上表現積極，並無因對手實力較弱，或早段取得入球而放軟手腳。就連入球功臣前鋒真高拿傷出之後，球隊依然保持進取；為球迷帶來一場賞心悅目嘅賽事。單以捷克比賽之認真態度，足以令到如英格蘭、葡萄牙及荷蘭等，一眾為留力而弄虛作假嘅所謂勁旅、領隊及球員汗顏。
一馬