日股彈升408點，升幅2.82%。韓股升42點，升幅3.51%。兩地股市，都有指數窩輪喺本港掛牌。
日經指數C輪9934：日經C輪2253，急升68%，收3.2仙。隻輪9月初夠鐘，溢價13.7%，槓桿率126倍（有效18.5倍），引伸波幅23.1%。隻輪行使價日經指數16800（現貨14879），好價外，好易直。
博日股升，揸日經C輪9934實際得多。隻輪9月初到期，輪價16.6仙（昨升36%），溢價4.9%，槓桿率24.2倍（有效11.9倍），引伸波幅23.7%，買賣唔難。
日經指數P輪9938：日股大升，但隻日經P輪3776則仍升4%。隻輪冇乜街貨，數據唔算差，變化唔跟指數走。
日股如果再彈多啲，博佢回頭，揸日經P輪，9938比較諗得過。9938喺9月初到期，輪價10.5仙（昨跌29%），溢價7.2%，槓桿率38.3倍（有效12.3倍），引伸波幅24.4%。
韓指窩輪：韓指C輪有3隻，升幅28%至45%，成交金額20萬唔夠。韓指P輪有兩隻，跌幅14%至18%。呢啲外國指數，好難引起炒家興趣，一來港人對韓指唔多認識，二來啲數據亂晒龍。就以韓指P輪4520為例，1個名牌資訊社列出溢價1884%而槓桿率則係0.05倍（肯定錯都得），1家輪商列出溢價2.3%而槓桿率則係6.5倍，另1個報價機則亁脆數據欠奉。信邊組數據？
章盛