雖然漁民團體一向都係煲呔死硬fans，但一旦有啲嘢影響生計，就算係friend都冇面畀，亦都可能令煲呔原本鐵票流失。
既然係咁，煲呔梗係要安撫支持者至得，容乜易下年選特首時少咗一截支持票，到時咪好冇面？結果，衞福局就建議將漁業貸款基金，由原本嘅1億元增加到2.9億元，等漁民可以喺休漁期向政府借貸度日。
噚日立法會財委會討論呢個問題時，好多議員都好似識穿煲呔詭計咁，篤爆政府無非用嗰新增1.9億去買漁民選票。財委會主席卿姐同自由黨肥仔張罕有地好合拍唱雙簧笑煲呔。
當卿姐話政府呢招無非都係為選舉啫，肥仔張就扮恍然大悟，仲話咁邊個咪有20票囉。卿姐即時糾正話係40票至真，肥仔張竟然再踩一腳，話咁就難怪要畀足兩億喇，結果在場好多議員都被佢哋嘅一唱一和搞到笑唔停。
傳真︰2623-9278
電郵︰[email protected]