近年香港掀起一片纖體風潮，女士們個個抱着愈瘦愈靚的心態，但胡杏兒近日為了演繹新劇《肥田喜事》的港版BJ，不惜自殘增磅變身肥美花旦，近月來唔肥唔食，食飽就瞓，在短短52日內增肥35磅，上圍由ACup變CCup，水桶腰粗達35.5吋，脹爆巨躉也暴增至40吋，以往合身的衣服全被迫爆。
現年26歲的胡杏兒，兩個多月前落實接拍無綫20集新劇《肥田喜事》，為演好劇中的港版BJ肥妹角色，她不惜在一個半月內展開自殘式瘋狂增肥，終於由原先的110磅谷至145磅，成為香港電視史上最肥花旦。
由朝食到晚
食完雪糕食麥樂雞
胡杏兒身高5呎7吋，身形高䠷，99年選港姐榮獲季軍時，三圍是32.5、23、33.5，可謂玲瓏有致，自體重暴升35磅後，上圍cup數不但由A變C，但腰圍35.5吋，巨躉40吋，加上一雙象腿，身形如一碌木，虎背熊腰，雙臂更粗如壘球棒。
胡杏兒日前換上一套今年1月出席賀年宣傳活動時穿過的粉紅色吊帶衫裙拍照，結果只能扣到一顆胸前的鈕扣，胸下位置則全被肥肉迫爆，橡筋頭的半截裙也迫至幾乎爆開，現場所見，她走路時只能腿貼着腿小步小步地行，十分搞笑。
以往食量一般的胡杏兒如今更變成為食貓，由朝到晚食不停口，昨日本報直擊她拍劇過程，發現胡杏兒一有空閒便四處搵食。昨早約10時，她到將軍澳電視廣播城準備拍攝《肥》，開工前先到飯堂歎餐蛋麵、腸粉及高鈣奶，中午到尖沙嘴棉登徑開工又食蛋糕，之後返家小休時食了一大碗粥，其後再出擊到奧海城拍攝外景，剛食完雪糕又食麥樂雞餐，之後又去茶餐廳開飯，食量相當驚人。
Fans唔認得
「嗰個女仔邊個嚟㗎」
昨日胡杏兒和李詩韻等在奧海城拍戲時，吸引不少途人圍觀，但師奶觀眾竟認不出眼前人正是《我的野蠻奶奶》內的「鐵嘴雞」，還問工作人員：「嗰個女仔邊個嚟㗎？」得知是胡杏兒後，又不禁掩嘴低呼：「嘩！肥咗咁多嘅？」
談到如何由索女變肥女，胡杏兒日前接受本報訪問時說：「我係由4月25號開始增肥，初頭一日飲兩次健身奶粉，超級難飲，初初好唔慣，我有個健身教練朋友教我食薯仔，自己就整薯仔沙律，口痕就食，連續三個禮拜之後，我已經肥到120幾磅，後來我冇飲健身奶粉，太多蛋白質，對個腎唔好，就換咗一隻營養奶粉，係畀嗰啲厭食症、要飲流質嘢嘅病人飲嘅，一罐都有成300幾卡路里，但感覺唔係好夠。
「喺屋企時，我食完一大碗炒飯，再整10粒水餃，飲汽水，食吓啲小食，好似雪糕、朱古力、麵包、湯同餅，我冇話要一日食幾多餐，係不斷食，通常食完晏晝飯就瞓兩粒鐘，有少少坐月feel，跟住又食吓飯、食吓消夜，𠵱家飲奶一日三次，係全脂奶，飲汽水，我都冇飲水咯。」
營養師睇住
「好似有嘢責心口」
胡杏兒續說：「我從來未試過咁肥，有啲衫已經着唔到，好多人話我犧牲好大，我又唔係好擔心瘦唔番，係買衫買唔到啫，噚日我去一間舖頭睇衫，試衫試到成身汗，我喺試身室試條裙，個女sales幫我拉拉鍊，佢都話：『真係唔得呀』，嗰刻唔知係好笑定傷心，終於體會到肥人買衫嘅苦況。不過公司都幫我搵咗個營養師，我有畀佢睇過，因為我有少少氣喘，瞓喺度時好似有嘢責住心口，都擔心自己膽固醇、血脂唔知有冇嘢，但好彩冇事。」
採訪：朱倬誼
攝影：陳偉權、娛樂突發組
場地、服裝：HystericGlamour
（波點衫及短裙）
