呢期人人都講波，唔睇番幾場，又點同人搭到嗲？好似嫻姐陳婉嫻咁，唔係咩特別瘋狂球迷，但都會趕潮流睇世界盃，之不過，佢只係睇朝早電視台播出嘅精華片段，例如啲球員射波入龍門嗰吓雄風，難怪佢覺得好刺激，因為佢都睇唔到啲悶場。
佢個黨友鄺大狀仲衰衰咁話嫻姐真係好勁，睇少少精華片段就講到天花龍鳳，仲踢爆嫻姐睇嚟睇去咪鍾意睇靚仔，即係碧咸之流，好似有少少妒忌咁噃。
嫻姐自己就話，前晚睇英格蘭，真係失望而回，覺得佢哋好唔掂噃，鬼咩，個高治同林柏特係咁射失，最終贏兩球都係好運咋。相反，之前睇完巴西後，嫻姐就即刻愛上，覺得佢哋腳法好好，組織能力又強，自己仲特別鍾意大、細哨。但係大哨家陣肥到隻豬咁，跑都跑唔郁咁，下場再唔改善，嫻姐都要諗諗轉投其他球星懷抱喇。
傳真︰2623-9278
電郵︰[email protected]