勾地表內今年第一幅走上拍賣場嘅地皮，由大冷門大嶼山長沙住宅地跑出，令到呢個原本較冷門嘅市場突然多咗人留意，中原地產研究部高級經理黃良昇就話，原來今年頭五個月，長沙住宅買賣金額有1531萬，接近舊年全年嘅1742萬；成交金額最高嘅係蝶崗14號屋，今年3月成交，售價高達940萬，拍得住愉景灣造價，反映區內別墅投資價值可觀。
中原又估計，7月18日賣地之後，將會進一步刺激區內嘅二手交投，全年買賣金額可望創出歷史新高。
其實由96到06呢11年間，長沙只係錄得21宗二手私人住宅買賣，總值6957萬，平均每年唔夠2宗，每宗成交金額331萬。舊年成交登記6宗，總值1742萬，已經係歷年之冠。99同00年都無成交，而今年頭5個月成交有3宗。
另外，市場消息話，滙豐銀行舊年標售嗰9間長沙美雅花園洋房，原來已經賣咗，成交價4655萬，平均每間517.2萬。
呢9間屋係滙豐畀員工度假用。美雅花園佔地3.42萬呎，總樓面1.366萬呎。
至於活躍於大嶼山嘅物業代理行範梁集團，據佢哋講，自從勾地消息公布後，多咗人查詢長沙以至整個大嶼山嘅物業市況，但暫時仲未見有實際行動。賣地對當地樓市有幾大影響，相信要遲啲先知。
電郵地址：[email protected]
