世界盃賽事進行得熱烘烘，無綫嘅世盃是非亦炒到杰撻撻。林敏驄不請自來晚晚去《2006世界盃——頂CUP好波》亂噏搶鏡，噚日佢又獻新猷，有雜誌報道李克勤扮大佬，話佢覺得自己係主持，大家都要聽佢講，林敏驄仲有意無意間大爆話林尚義（阿叔）唔妥克勤，又話阿叔覺得克勤今屆首世盃主題曲唔及上屆好聽，十足做咗阿叔代言人咁，搞到個節目火藥味好重。
「贏波就夠」
馮仁昭覺得克勤呢個主持，將節目嘅氣氛同流程控制得唔錯，對佢嘅指摘啱唔啱真係見仁見智，至於克勤同林敏驄，其實佢兩個喺四年前嘅世界盃開始不和，當年克勤同陳百祥喺無綫世盃記者會上玩到用香檳淋林敏驄，之後就開始積怨，到今年世界盃，林敏驄晚晚上節目踩場，新仇舊恨同足球賽一樣咁精采。噚日馮仁昭同克勤傾過，對於同林敏驄嘅是非，佢話：「我𠵱家鍾意啲簡簡單單嘅嘢，唔鍾意嘅嘢就當睇唔到，英格蘭贏咗波，我開心到爆，乜都夠啦。」
至於林敏驄喺節目瘋言亂語，前晚馮仁昭都入咗電視城了解，不過當晚佢冇出現，克勤話作為主持，好難控制嘉賓意見，只可以喺需要時講句「嘉賓意見唔代表本台立場」，佢唔想對嘉賓嘅意見發表評論。阿叔就話：「佢哋搞吓笑啫，執咁正做乜呀。」伍晃榮對於自己扮霍金，佢話絕對無意貶低呢位受世人景仰嘅物理學家，希望大家唔好誤會喎。
而監製李漢源話佢哋冇迫阿叔退休，仲話克勤同阿叔相處好融洽，一啲問題都冇。
