鏞記甘大公子與左丁山認識多年，但原來呢個世界好細，亦非常巧合。左丁山細路哥讀書嗰陣，因屋企（其實係板間房）狹小，與父母同住，讀書做功課都係坐在牀上，後來日漸長大，發覺唔多掂，於是中五會考之年成日去咗同班死黨屋企溫書，死黨成家人住喺涼茶舖閣仔，涼茶舖樓上有一間貨倉，堆滿裝涼茶嘅麻包袋，左丁山就與死黨在貨倉讀書，夜晚將報紙鋪在涼茶麻包袋上，和衣而睡，一大清早就起身衝去麥花臣球場公廁，然後返屋企梳洗返學。
好多年後，先知道甘大公子係呢位死黨嘅表哥，真係往事如煙，諗番當年如果唔係晚晚與甘公子表弟瞓涼茶麻包袋讀書咁勤力，今日未必有資格上鏞記食甘公子嘅靚嘢。
昨日講起「滒蛋」（音窩蛋），先至醒起「滒」字大家唔識讀，於是叫晒「窩蛋牛肉飯」，左丁山成日以為即係打一隻生雞蛋「窩」在牛肉飯內咁解，經甘公子解釋，先知道「滒蛋」嘅真正意思。甘公子知道左丁山唔識，講埋其他少見嘅字眼：
「涫」，讀若昆上聲，沸湯謂之「涫湯」，廣東話有「涫水漉腳」，今時人誤之為「滾水漉腳」。
「煠」讀若習，清湯曰煠，時人誤以「熠」為「煠」，用涫水將鹹肉煠過，辟除鹹味，先至切片烹煮，叫做「烹煮陳鹹肉」。
「瀹」讀若灼，以菜與肉入湯煮也，「白瀹蝦」是真，「白灼蝦」乃別字。
「湯」，廣東人宰牲曰謂之「湯」，因宰後必先以湯去毛，「湯雞殺鴨」今已誤成為「劏雞殺鴨」。
「餈」讀若「慈」，「糯米餈」唔係「糯米糍」，餈稻，餅也。
「買送」不是「買餸」。送者，送飯也，有佳餚「送」啲飯入口下咽，用「餸」就錯了。
唔睇書，唔聽甘公子講食經，唔識咁多字，廣東食經，實在大有學問，如今到茶餐廳見到「餐蛋反」「魚蛋面」，「窩蛋牛反」，係現代香港嘅茶餐廳文化，別樹一格，不可與粵菜傳統混淆。