招積域：Helloeverybody！I'mback！
侍仔：去完台灣旅行，零舍醒神啦，有冇買手信畀我呀？
招積域：今晚意大利同捷克開「細」，補埋捷克1:0波膽。
菠蘿文：乜你咁無誠意㗎？隨口噏當係手信，人哋侍仔追韓妹都晚晚等人哋收工啦，抵你俾女飛！
招積域：天涯何處無芳草，世盃當前，兒女私情擺埋一邊啦。嘩！門口嗰位姐姐着迷你裙加埋件小背心！侍仔你望吓，真係有8分以上㗎！
侍仔：你係咪想死？佢叫Raine，係我女朋友嚟㗎！
招積域：真係失覺晒…，估唔到侍仔你成個電車男咁款都追到靚女，抵我再醒多條3串1畀你，今晚3場主隊單W，乘埋有3倍㗎！侍仔嫂，坐埋嚟一齊飲杯嘢啦！
Raine：3倍都拎嚟串，你係咪男人嚟㗎，咁鬼細膽！抵你無女吼！畀我就單棍買意大利3:1波膽。美國中場經唔起考驗，上場見雷拿拎住個波都搵唔到人畀；加上意大利今屆好有決心，相信響完頭炮之後唔會龜縮，大波膽可以博一博。
菠蘿文：原來侍仔嫂都識賭吓咁喎，聽晚南韓又點樣睇先？
Raine：對多哥雖然踢多個先贏到，但隊波嘅信心已經返晒嚟，希望佢哋比賽初段可以打壓迫踢法，迫到法國班老人家無氣啦，我估今場開「大」，再加「客勝」同波膽2:2。
招積域：雖然拳怕少壯，但法國佬唔會衰多次啦，文仔你點睇呀？
菠蘿文：我想法國再失分，證明球隊唔可以再靠班老鬼撐場，𠵱家仲回味緊8年前嘅光輝，法國人真係死都要面。
高洛文