懷孕四個月的袁詠儀（靚靚），視行街購物為大肚婆運動，昨日記者在金鐘太古廣場碰見靚靚到Joyce掃減價貨，她試衫期間一度人有三急，店員更陪她一起到洗手間如廁，讓靚靚感受到大肚婆前所未有的貼身服務。
昨日下午四時許，懷有四個月身孕的袁詠儀腹部微隆，單拖於金鐘太古廣場的名店Joyce現身，原來該店近日正大減價，記者見靚靚又揀T恤又揀連身裙和平底鞋，忙個不亦樂乎。
專人貼身侍候
大概40分鐘後，靚靚在試穿上一條黑色鬆身連身裙時，竟忽然人有三急，為免大肚婆忍尿，店員遂把靚靚試穿衣服的防盜器除去，然後陪穿着店內衣服的靚靚到洗手間。
早前有傳靚靚將接拍爾冬陞和陳可辛的新片，對此靚靚笑說：「係咩？唔知喎，我交晒俾經理人處理！太辛苦嘅話我唔會接！」對於真肚上陣一事，靚靚只笑着摸摸腹部，未有正面回答。靚靚如廁後步出洗手間，她見記者不停拍照，遂指指自己所穿的衣服，然後對着店員說：「呢件衫我唔買，都見咗報！」
「我𠵱家好開心」
問到腹中塊肉是男是女，以及打算順產還是剖腹時，靚靚說：「古時候啲人都唔知生仔定生女，我想BB出世嗰日先至知，呢啲係上天嘅安排。開刀定自然分娩就等醫生安排。」
早前張智霖表示靚靚胃口欠佳，對此靚靚表示情況已見好轉：「胃口好咗啲，可以食到飯，但就未去返以前胃口。」有指孕婦穿淺色衣服的話心情亦會變好，靚靚聞言後笑道：「我𠵱家都好開心呀！」
靚靚返回店內繼續購物，結果買了三大袋衣服離開，而店員除了陪她到洗手間外，更陪她到停車場取車，大肚婆待遇果然與眾不同！
採訪、攝影：馬建華
