仲有唔夠半個月就到7月1日，民陣同其他民間團體密鑼緊鼓宣傳，希望動員市民上街，目前反應相當麻麻，但係如果有多啲夠份量嘅人企出嚟，相信動員效果會事半功倍。舊年12．4爭普選大遊行，前任政務司司長陳方安生失驚無神走上街頭，發揮嘅政治能量震動中、港政壇，政界中人都好關心陳太今年7．1動向。
噚日陳太出席一個公開活動，離開前記者高聲問佢今年7．1會唔會上街，聲浪之高相信全場人都聽到，惟獨陳太充耳不聞，揮揮手就走人，留下一個問號。
據八方了解，陳太的確希望可以用佢嘅個人魅力令北京重視港人嘅民主訴求，所以毅然上街，奈何中方為咗穩定壓到一切，寧願繼續重用煲呔，令陳太感到十分冇癮。雖然陳四萬講過佢唔會競選下屆特首，但係世事難料，當年夠冇人估到老董退，煲呔上，所以一日未吹完場雞，陳仍然有機會，就好似打世界盃一樣，賽果難料。
傳真︰2623-9278
電郵︰[email protected]