捷克上場喺毫無壓力嘅情況之下，大勝美國3:0，中場發電機路斯基狀態大勇，個人梅開二度，可惜另一位入球功臣真高拿傷出，今場無法上陣，好在後備仲有一位高大嘅射手盧雲歷，隨時可以候命，對於高空攻勢方面，絕對唔會有太大嘅影響。
一對前鋒把握力差
捷克今場只要踢番上場對美國嘅表現，贏波問題不大。相反加納攻力認真麻麻，一對前鋒基恩同艾莫亞把握力差，經常錯失良機；中場方面艾辛、艾比亞同蒙達利等演出亦未如理想；門將京士頓又經常錯漏百出，咁嘅表現實在揀唔落手。今場一於信演出穩定嘅捷克，揀主客和嘅主勝。
森保達復出鎮後防
另一場心水係意大利對美國。意大利上場對加納嘅表現尚算對辦，整體球員發揮唔錯，雖然射手東尼欠缺大賽經驗，但勝在狀態好可以搭夠。今場對意大利嘅好消息係後衞森保達可以傷癒復出，大大加強後防實力。
睇過美國上場對捷克嘅表現，絕對唔收貨，組織同攻力唔夠，千祈唔好因為世界排名而高估美國，佢哋對住實力較強嘅球隊，就立即見真章，今場美國對住前中後三路都平均嘅意大利，應該會再輸1場。但為穩陣起見，都係揀個主客和嘅主勝。
陳樹鵬（阿鵬）
有線球彩台主持
電郵：[email protected]