世界盃邊隊攞冠軍未必咁快估到，不過站在投注角度，估到邊支球隊成為「魚腩」，3戰全輸出局，隨時帶來更可觀收益；今日就有3支首仗輸波球隊登場，形勢上，世界排名最高嘅美國，反而最有機會輸多場畀意大利。
個別主力嚴重老化
美國𠵱家世界排名第5，比起阿根廷、英格蘭仲要高，不過知道呢個世界排名計法嘅球迷，都知道只係「得啖笑」。美國喺中北美洲外圍賽，對住洪都拉斯、危地馬拉之流，梗係威係勢啦，不過嚟到決賽周，美國實力真係見晒底。上屆美國靠機動整體打法殺入8強，不過過咗4年，打法冇咩大變，易俾對手睇穿外，個別主力嚴重老化都係問題，中場大腦雷拿32歲，中鋒麥比迪30有3，活力根本追唔上後生仔當路雲同比士利，結果中前場打開2截，首仗對捷克真係冇咩特別組織性埋門。
意大利不愧係大賽專家，首仗對住加納，「玩敵」姿態下贏2粒，基本上今仗贏波，入16強機會達9成9；加上美國今場焗攻，意大利一心打反擊，更加有利發揮，意大利主勝低開到1.45倍，絕對有道理。
伊朗士氣受損難捱
如果嫌4成5回報唔夠喉，葡萄牙單W亦都可以串埋，事關伊朗隨時有係另一支2戰全輸球隊；其實伊朗整體實力，唔應該落到咁嘅田地，不過首仗實在輸得太慘，後防犯了「非職業球員」嘅錯誤，失3分唔係最慘，最慘對士氣有嚴重打擊。葡萄牙首仗點到即止攞3分，耗力唔大，中場迪高亦有望復出，中前場組織力更好，伊朗好難捱。葡萄牙W有1.35倍，串埋意大利都有接近2倍回報，都唔錯。
牽牛