聽日就係父親節，圈中有不少已為人父嘅大忙人，就連想瞓都未必有時間瞓嘅佢哋會點樣慶祝父親節？作為人父，佢哋又點樣維持與子女之間嘅關係呢？佢哋又想收乜嘢父親節禮物呢？最難忘嘅父親節又係點呢？多個問號10萬個好奇之下，佢哋嘅答案卻出奇平淡。請即參考星爸們開晒口最想要的禮物，今日快啲準備定明天送畀父親大人啦！
記者：許維雅
許冠傑：最難忘揸船出海睇瀑布
許冠傑現時已不接受傳媒訪問，我哋惟有請許懷欣幫手問咗佢2個問題。阿Sam最想要乜嘢禮物？佢就話最想個仔送書畀佢。最難忘嘅父親節？就係阿Sam揸船載一家人出海睇瀑布。無諗到阿Sam嘅答案竟然同Ryan預備送畀Sam的父親節禮物一樣（詳情請看左版），兩父子果然感情好好，Ryan更係非常咁了解佢老竇。
周啟邦：我想要1首詩
身家豐厚嘅周啟邦連個廁所都係金嘅，真係無乜嘢買唔起，所以佢最想要嘅禮物唔係用錢買得到嘅，而係１首詩。囝囝周國豐身在上海工作，所以周啟邦都係同啲老朋友食飯慶祝：「費事去上海搵個仔喇，萬一人哋女朋友又喺度，我咪做咗電燈膽，做老竇最緊要通氣！」至於點解想要首詩，原來係佢個仔大學時期曾經送過1首詩畀佢，內容大概係：老竇對手就好似農夫一樣，種1棵樹用咗好多心血同心機，雖然樹就唔識講多謝，但係農夫都唔會介意。呢首詩睇到邦邦喊咗出嚟，所以好想收多次、喊多次。而最難忘嘅父親節，就係阿仔細個嗰陣畫咗條紙呔畀佢，佢梗係好開心，但係老婆就爆咗句：「啋！大吉利是咩！」邦邦聽到覺得好好笑，所以至會記到𠵱家。
王敏德：好緊張呀等個Kiss
王敏德有3個仔女，所以佢話最緊要夠公平，每一個都要咁錫，呢個係做老竇嘅責任。佢唔會關心父親節禮物係乜，最大問題係佢哋會送，咁就代表佢哋有掛住爸爸，有擺佢喺心。「我希望佢哋畀Surprise我啦，我都好緊張呀！如果嗰日我一起身佢哋就走埋嚟錫啖我，送禮物畀我就好喇！如果無，我都會失望，即係我做爸爸做得唔好。」話唔介意禮物係咩，講講吓王敏德又話要暗示畀仔女佢想要Sportswear，因為驚佢哋嘥錢買啲佢唔鍾意嘅禮物喎！
任達華：周六母親節周日父親節
任達華最想要嘅父親節禮物係一家人平平安安，雖然今年佢唔喺香港過父親節，但係喺佢心目中，只要仔女有心嘅話，日日都係父親節。「兩父女之間唔應該講太多物質，應該着重溝通，我一有時間就會講故事畀佢聽，多啲同佢傾偈，最多放棄瞓覺嘅時間。好似上星期日我就帶咗佢去沙灘玩水，彌補今個星期陪唔到佢嘅時間。」任華達仲話最好每個星期六都係母親節，每個星期日就係父親節，咁就可以增進父女之間嘅感情，家庭問題都少啲，社會都和諧安定啲咁話。
任達華印象中最深刻嘅父親節係佢爸爸親手捉咗隻蟋蟀，仲用個月餅罐載住送畀佢，令佢覺得就算窮，都可以好開心。
張達明：期望收到鬼馬嘢
做緊有線世界盃嘉年華嘅張達明今年要喺工作中度過父親節，對於仔女嘅感覺佢就話又愛又恨，聽話就好得意，打交爭嘢玩就好煩。「今年父親節唔會期望收到禮物，希望佢哋準備啲鬼馬嘢𠱁吓我啦，錫啖我做吓啲手作仔送畀我都好開心喇。」達明最好笑嘅係佢超級偏心：「我錫女出晒名，有時我出門口前叫佢錫啖老竇，佢死都唔肯，但係呢個時候個仔竟然撲埋嚟話：『我錫晒你吖！』咁我惟有讚佢乖啦，其實個心覺得個仔好Cheap。」嘩，阿達明仔仔真係慘，筆者話佢咁會搞到個仔心理唔平衡，佢仲答咗句：「我唔咁做心理仲唔平衡呀！」最後佢補咗一句最想要嘅禮物係放兩日假，唔使照顧兩個仔女，咁就好滿足喇喎。
Keyman：畀我個女𠱁我老竇
呢排晚晚都見到嘅有線評述員Keyman馬啟仁原來都已為人父，仲話同個女嘅關係好似朋友一樣：「對父親節嘅感受係同你做咗幾耐老竇有關，喺我眼中父親節我只會諗起我老竇，唔會醒起我都已經做咗人老竇。今年父親節應該會一家人三代同堂慶祝，將𠱁我老竇嘅責任轉嫁畀我個女，所以我唔介意個女唔記得父親節，我仲會提佢㖭。」講到最難忘，就係有一年佢想送對波鞋畀身為球迷嘅老竇，點知臨買一刻先發覺老竇從來唔着波鞋，嗰一刻先覺得自己原來唔夠留意老竇，有啲內疚。
只要1餐飯
