薄扶林貝沙灣今個月租務成交非常活躍，平均每日都有單位租出，呎租仲愈嚟愈高。美聯徐志強話，啱啱有個大單位租出，呎租接近33蚊，創屋苑分層單位歷嚟新高。貝沙灣呎租最高試過39蚊，不過只限於相連或者複式，一般分層單位平均呎租只係28至30蚊，今次都算係一個突破。
講緊嘅係三期3座中層B室，2560呎，連1個車位，由外籍租客承租，月租8.4萬，每呎32.8蚊。業主喺04年6月以2150萬買入，租金回報率有4.7厘，以豪宅新盤計，相當唔錯。
徐志強話，個單位所以租到咁好價，係因為分層單位嘅租盤，集中1600呎，2500幾呎嘅租盤只有10間左右，佔整體僅2%。由於盤少矜貴，租客都肯畀多啲，事實上，以同樣租金，都夠喺山頂租個2000幾呎嘅低密度住宅，不過，唔少租客貪貝沙灣新淨，會所又夠大，同樣價錢，都唔揀地段好啲但設施欠奉嘅山頂租盤。