唔知係咪人人都掛住睇世界盃，成個市都靜晒，連新聞都冇乜，好彩有單靚賓卡一擲萬金去學跳舞嘅熱門話題，否則城中班阿太飲tea之時，都唔知講咩好。
周文軒娶外孫新抱
唔怕，因為馬上就有單豪門婚禮，勢必轟動全城，到時睇吓邊個有份去飲、邊個着得最靚、擺酒食咩餸，咁就可以講足一個下晝。邊家人辦喜事？就係蘇州紡織商南聯周文軒迎娶外孫新抱，大馬糖王嘉里郭鶴年有女于歸。呢兩個家族，由上海到南洋到溫哥華都咁威水，一對璧人又郎才女貌，肯定吸引全城記者。哈，你估《南華早報》會唔會獨家登番輯相等大家欣賞吓呢？
點解講《南華早報》？事關新娘郭惠光係佢哋嘅執行董事。郭小姐年紀28歲，喺哈佛讀完書之後，入咗美資大行摩根大通，但冇耐就轉入《南早》做財經記者，咁佢人又靚學歷又好，最重要係阿爸係大老闆，所以一年就升咗做執行董事，成為呢張英文大報最年輕又最有實權嘅話事人，外號郭亞女。聽講佢好識做生意，特別注重中國商業經濟嘅古仔，對新聞要求亦好高，所以聽到佢出閣，《南早》中人好開心，睇怕有一年半載都見佢唔到。
新郎叫吳繼霖，30歲。話說周文軒有六個女，一個嫁咗畀馮國倫，另一個就嫁入吳家，即係新奶奶。吳家在溫哥華做生意，而吳公子就喺美國讀書，傳聞有次佢返港度假探望外公，同郭惠光擦出愛火，今年三月註咗冊，下星期一擺酒。有人問過佢位外婆一對新人婚後會住喺邊，答案係新加坡。
香格里拉辦喜宴
糖王除咗係嘉里及《南早》大老闆，成個香格里拉酒店集團亦係佢嘅，所以掌珠出閣，當然在自己地頭辦喜事；男女兩家交游咁廣闊，所以呢個世紀婚禮會搞足三日，實大把嘢八啦。
傳真︰2623-9278
電郵︰[email protected]