民主黨俾《公司條例》搞到頭痕痕，事關叫佢哋公開晒黨員名單，咪即係令所有黨員活於恐懼之中！所以今次民主黨徵詢法律意見之後，決定同政府對簿公堂，最快會喺今個月底前，就《公司條例》申請司法覆核，希望可以令黨員釋除疑慮啦。
負責搞呢壇嘢嘅仁哥就話，唔少黨員已經主動請纓，話肯向佢哋提供資料，話明點解覺得公開名單會影響佢哋生活，提高民主黨嘅勝算。加上仁哥發現美國喺馬丁路德金年代，就有個黑人組織擔心人身安全受影響，要求唔使向政府交出會員名冊，結果同政府打官司，最後法院判黑人組織贏，咁就已經為民主黨打咗支強心針，證明佢哋好有勝算啦。
仁哥再三強調，佢哋份名單冇啲會令公眾人士聽到之後就彈起嘅名，今次堅持唔公開名單，真係純粹為原則而戰，就算最終輸咗，揹起一大筆堂費，佢哋都覺得係值得嘅。
傳真︰2623-9278
電郵︰[email protected]