採訪隊推介
聰仔心水：讓球主客和：意大利主勝
華度心水：主客和：意大利W
早幾日喺漢諾威，睇過意大利對加納，成場波加納球員略嫌有勇無謀，可能係整體球員都比較年輕嘅關係。難怪鄉里話，今屆賽事對於加納嚟講，唔係可以做出成績嘅適當時候。
話說德國呢邊都幾多黑人移民，呢日就撞到個加納籍嘅搵食車大佬Kwani。華度好多時同外國人溝通，都會用足球打開話匣子；其實Kwani見到華度掛喺心口嗰張世界盃記者證，已經主動傾波經。講兩講，佢仲拎咗張加納對美國波飛出嚟，四萬咁口同華度分享，佢有機會入場睇班同鄉比賽嘅喜悅。
爭取經驗備戰南非世盃
張波飛座位喺龍門後面，但只係35歐元，Kwani已經好滿意；原因竟然係認為加納今屆雖有唔少外流歐洲大球會好手助陣，但承認整體質素仍然有限，個別主力仍然年輕，最老嗰個都只係31歲嘅緬恩斯中場艾度。
所以Kwani預咗加納今屆當係吸取經驗，呢次就只係買張平價波飛入場支持下班同鄉，期望4年後23條好漢喺自己非洲地頭會有更好成績（下屆賽事由南非主辦）。華度連隨問埋加納有冇機會贏到一場半場咁呢？Kwani話最大機會係鬥美國，所以佢都只係撲呢場波飛。
加納對住意大利輸0:2，次輪遇上另一歐洲球隊捷克，正如Kwani話齋，搶分機會唔樂觀。
文：華度