這個父親節，男人最好的節目，是老婆唔再咿咿哦哦，任他睇波，晚晚直落。仔女不用送唔等使的禮物，世界盃波飛當然是夢幻的大禮，不過為父者知道，仔女唔掂足球呢瓣（他們鍾意唱K溜冰），老婆對波牛不屑一顧（她的嗜好是跟其他老婆大人結伴上深圳跳社交舞和按摩），全家只得自己一支公睇波，就算去到德國現場睇總決賽，孤家寡佬，唔慌過癮。
而這個父親節前後，男人感性些少的話，肯定不會跟大圍，羊群式齋捧強隊。例如，當西班牙盡情「數」烏克蘭的92分鐘裏面，男人幾乎不忍心看下半場，當大特寫鏡頭不斷捕捉2004年歐洲足球先生舒夫真高被吹越位那副無奈神情時，男人巴不得萊比錫中央體育場忽然降下黑色暴雨，好讓賽事腰斬，擇日重賽。到時，坐在西班牙王儲夫婦身邊的，可能是烏克蘭漂亮的前女總理，招牌的辮子盤頭頂的靚樣，神助國家隊打贏西班牙。舒夫真高終於黐波落腳，不用行行企企，淪為前線上無order落的侍應。
男人輸波最痛，大部份當了父親的球員，沮喪的臉孔讓孩子見到了，得花四年嘴舌解釋。這四年裏的父親節，一家人有默契，不提足球。球迷倒容易復元，只要沒賭波負債，就算巴西明晚輸畀澳洲，擁躉只會撼頭，未至心絞痛。事關波是圓的，變形的PAAG假波，半場已經穿崩。男人堅信足球能打破宿命，就像黑洞原理那樣牢固，低潮失守的難關很快便捱過。