噚日係金銀業貿易場每2年一度，改選管理班子嘅大日子，按照一貫傳統，喺選舉日佢哋會休市一天，等啲成員安心投票，結果由上海總會理事長李和聲位公子，即係大唐金融嘅李德麟，當選做新一屆理事長。
李德麟話，當選梗係開心，但就冇諗住要慶祝，淨係覺得「有壓力」，個會又有好多事都「未解決」，好似24小時交易、電子化咁，佢希望喺任內可以做到成績啦！
按照個會嘅規定，理事長一職可以連任一次，即係最多做4年，華華聽聞上一屆理事長程文傑，本來坐定粒六等連任，點知中途殺出李德麟，咁李家家底夠厚，伯爺係證券界元老，又係老上海，就連金勞詹都開到口話支持「細姪」做金王，當選都係意料中事。