合和主席哥頓胡應湘本自傳出街，噚日喺英國文化協會搞簽名會，哥頓由公關同私人助理傍住到場，雖則屋企人冇嚟，但見吸引到半百「粉絲」，佢老哥成晚心情靚絕，平日講到屋企人，佢都係一句起兩句止，但噚晚唔止公開大讚老婆，仲自認係聰明男人，真係風騷到暈。
哥頓話，當年初入大陸搞基建，通常都係星期五下晝北上，過埋周末先返落香港，前後70幾個星期都係咁，佢老婆唔怕辛苦，每次都陪佢上上落落，諗起都覺得辛苦咗對方。不過，佢跟住又笑笑口話，可能老婆怕佢包二奶，所以先做跟得夫人。
哥頓仲話太太好鍾意跳舞，係咪拉丁舞就唔多清楚，因為佢自己好忙，做唔到老婆舞伴，但其實唔想臨老學跳舞先係主因。哥頓唔單止冇時間學跳舞，更加唔會自己寫書，唔係有作家話有興趣想寫佢嘅古仔，都唔會有呢本自傳面世。哥頓話，做咗成世工程師，唔通家吓先去做莎士比亞咩。
本書出街之後，哥頓話已經送咗一批畀朋友，咁華華問佢有冇送畀超人誠哥，佢劈頭就話，冇諗過送畀佢喎！
前公關顧問操刀
哥頓本自傳叫《TheManWhoTurnedTheLightsOn》，作者RosemarySayer係哥頓嘅前公關顧問，97至00年幫哥頓做過3年嘢，之後就話要寫佢嘅古仔，咁唔想俾人寫錯晒，哥頓咪索性自己爆料畀對方，但就話明唔會喺財政上資助對方，同時亦都唔會左右對方點寫。兩人前後傾咗幾年，飲咗N咁多杯中國茶，本書先至完成。
李華華
讀者如有任何意見或報料，歡迎發送電郵至[email protected]。
