美股做咗全球股市指揮棒。隔晚美股升，帶起日股、港股跟埋，恒指進賬187點。中海油（883）、滙控（005）同中移動（941）3隻重磅股，總共貢獻104點，包括恒指5成半升幅。
升幅最大3隻恒指股係中海油、聯想（992）與德昌（179），升5.3-5.7%。當中聯想與德昌業績唔靚，但卻跑贏好多其他藍籌。
港股叫做連升兩日，但未可輕言見底。喺升市中高追C輪，最好諗過先。昨日好多恒指C輪，升幅未跟貼恒指，可以代表佢哋未升得夠，亦可能係炒友對後市睇法仲係有保留。
恒指P輪4800：吼恒指再升多一二百點，低買恒指P輪，博大市再跌。正路之選有4800，8月尾夠鐘，輪價17.4仙，溢價4.3%，槓桿率24.6倍（有效11.4倍），引伸波幅23.5%。近期啲對象有4450，貪佢溢價低啲。4450下月尾到期，輪價15仙，溢價1.5%，槓桿率22.4倍（有效14倍），引伸波幅21.4%。4450波幅會大過4800。
恒指C輪4783：個市波動難免，萬一失驚無神跌幾百點，則低買恒指C輪博反彈，對象係4783，8月尾夠鐘，輪價21.8仙，溢價4.1%，槓桿率17.7倍（有效10.3倍），引伸波幅26.5%。
章盛