呢個星期日係父親節，原來呢個世界真係好多父子兵。八方噚日去中央圖書館聽英皇書院80周年校慶講座，見到有線高層趙應春同佢阿爸趙惠樂一齊出現，先知趙老先生係嚟捧個仔場，因為阿春係其中一個講者。
係人都知阿春係King's出品，同行會召集人梁振英係校友，但係原來趙老先生都曾經喺英皇教中文同體育，振英哥同廣管局前主席梁乃鵬都係佢學生。
噚晚個講座以傳媒同報業為題，唔怪得除咗阿春同梁乃鵬之外，仲見到前輩龍景昌。
阿春一向風騷，世界盃多咗好多新客仔又真係值得高興，佢笑住話，「呢輪冇覺好瞓，因為要睇波。」下屆世界盃多咗小小超嘅now出嚟爭，佢就更加冇得瞓喇。
傳真︰2623-9278
電郵︰[email protected]