政府為咗要趕走霸住公屋單位唔願搬嘅富戶，實施雙倍租金以至市值租金政策，就算趕佢哋唔走，都可以收番多啲租金幫補吓。
有好多公屋富戶都會選擇買私人住宅，貪升值潛力大啲，但係有啲仲精明嘅就選擇買居屋。雖然𠵱家政府冇推出新居屋，但係第二市場一樣有大把揀。美聯分行經理劉冬冬話，一個公屋客跨區入市，以綠表買咗個葵涌荔欣苑B座3房單位，面積800呎，都係140萬咋，每呎1750蚊。
聽講，買家已經交開雙倍租金，因遲啲仲會再加租，所以索性買樓，佢仲畀樓價五成做首期，咁每月供款就少過第日要交3倍嘅租金，肯定供樓平過交租啦。
𠵱家樓價仲係算貴，就算買居屋，大單位喺自由市場閒閒地都要二百萬或以上，公屋住戶可以用折扣價錢入市，咪可以減輕負擔，橫掂都係要畀咁多錢，買樓點都化算啲。第日放盤，可以喺自由市場同第二市場一齊放盤，賣出機會都大啲。
電郵地址：[email protected]