東九龍兩個大型屋苑藍田滙景花園同觀塘麗港城，近日咁啱分別有連天台單位成交，呎價都係4100幾蚊，不過相對屋苑嘅平均呎價，滙景嗰間明顯偏低，利嘉閣伍民亮話，滙景13座頂層C室，785呎，連349呎天台，賣咗324萬，呎價4127蚊，比同類單位，只係略高3%。
伍民亮講，滙景785呎單位都係望園景，高、低層分別唔大，所以呎價唔會高好多，又或者原業主喺90年以133萬一手買入，反正勁賺離場，收順啲賣咗佢，都賺191萬。
睇番麗港城個4期22座頂樓單位，644呎，連466呎天台，成交價265萬，呎價4115蚊，比4期平均呎價3600蚊，高14%，算係理想水平，仲創咗呢個月嘅新高?。美聯黎洛文話，單位望全海景，加上成個4期只得1個連天台放盤，物以罕為貴，貴啲都唔出奇。不過原業主喺98年以427萬買入，損手離場，8年蝕咗162萬。
另外，利嘉閣出咗個報告，話5月份全港連天台單位成交合共309宗，比4月份多咗28%，創13個月以嚟嘅新高。