早前「誓神劈願」話要選台北市長嘅國民黨立委蔣孝嚴，噚日暫別寶島呢片又話要罷免總統，又話要倒閣嘅是非之地，帶埋靚靚夫人黃美倫來港，出席響灣仔會展舉行嘅「香江兩岸和平發展論壇」，會場外仲有佢本新書《蔣家門外的孩子》賣。
論壇甫完，十幾廿個fans飛撲埋嚟，將蔣氏伉儷團團圍住，不斷從四方八面將新書「隊埋」蔣先生面前，要求攞簽名同拍照。「最後一個啦，最後一個啦……」現場工作人員不斷催促蔣孝嚴「夠鐘喇！」但熱情嘅「粉絲」仍然不斷湧埋嚟，認真受歡迎。
終於，八方等咗成十幾分鐘，先至影到張蔣氏伉儷嘅幸福恩愛照片。蔣夫人話，佢老公親筆撰寫自己嘅成長經歷，佢仲大讚書中內容好感人。《蔣家門外的孩子》講及蔣孝嚴得唔到蔣經國嘅父愛，仲揭露佢媽咪章亞若猝死之謎。今日下晝三點至五點，蔣孝嚴會喺中環上海總會舉行新書發布會，想簽名趁早。
傳真︰2623-9278
電郵︰[email protected]