港股連續第2日上升，但係大跌後在低位爭持，還是出現真正的反彈（起碼由低位起番800至1000點），暫時仍未能確定。恒指數15435，升187點，期指同步，但大市成交只得267億元，市場觀望氣氛濃厚，好多人未復入市信心。
恒指由高位17328掉頭回落，到低位15205，足足跌咗2123點，跌幅12.25%，250日線（噚日喺15293）亦曾一度失守。通常大跌市後必然會有一次真正的反彈（唔係由低位回升2至3百點嗰種），所以，無論現時大市在低位爭持多久，預期的「真彈」遲早會出現，後市有機會重上16000點水平。
中資股呢個浪跌得急，H股指數由7468跌到落5864，跌幅21.5%，噚日升番135點，今日若能裂口高開及高收，則可確認短期跌勢到底，初步可重上6500點水平。
石油股全部由低位回升，中石油（857）收7.35元，升3.5%；中石化（386）高收3.95元，升4.6%；中海油（883）最高5.7元，收5.55元，升5.7%；中油（香港）（135）收3.2元，升4.9%。
中油PE最低最吸引
4股之中，由5月高位起計，跌幅最大係中油，跌咗39.5%；第2係中石化，跌幅31%；跟住係中石油的26.0%同中海油的22.2%。跌幅最小的中海油，噚日反彈幅度卻最大，短線而言，中石油同中油都可以一博。
中石油05年（12月結）營業額5522億元（人民幣．下同），升39%；盈利1333億元，升28.4%，每股盈利0.75元，期內實現油價為每桶48.37美元，升43.4%，但仍遠低於國際水平。
受惠於國際油價持續高企，中石油今年首季實現油價為每桶54美元，花旗證券表示仍然看好油價走勢，並調高中石油的每股盈利預測，06至08年分別為0.857元、0.892元同0.85元，維持「買入」評級，目標價為9.0元。
中石油呢個浪共下跌2.5元，若反彈0.382，股價可見8.05元；若反彈0.5，可重上8.35元。
中油早輪跌咗2.0元，反彈0.382同0.5，股價分別可見3.775元及4.025元。中油預測PE最低，亦最吸引。
郭兆誠