近期人氣急升嘅經濟發展及勞工局局長葉澍堃（右二），啱啱先陪完煲呔去雲南，前日又再陪煲呔去昂坪試坐吊車，紅人地位不言而喻。
佢噚日主持完香港國際旅遊展開幕禮，仲好風騷咁帶住一齊做主禮嘉賓嘅國家旅遊局局長邵琪偉（右）喺現場四圍參觀。
大家睇張相估唔估到葉局長喺度做緊乜？估唔到呢，等八方開估啦，原來葉局長喺度玩緊蠟手像，仲係出晒名嘅杜莎夫人蠟像館幫佢整。
葉局長做定手像都啱數，因為佢肯定仲有排玩。八方聽聞，喺肥龍力薦之下，佢最近得到煲呔嘅信任，連明年新班底都已經預埋佢一份。
大蛇葉雖然冇試過喺局長排名榜居首，但係永冇排後面，穩守中間，就夠煞食啦。
張志華攝
傳真︰2623-9278
電郵︰[email protected]