過兩日父親節，老竇攞正牌老屈仔女一餐。講真，做仔女應份科水，諗吓，生你養你，育你教你，無老竇點得你哋條條化骨龍生得咁牛高馬大？當中嘅甜酸苦辣老竇一個人頂，做仔女應該有番啲孝心，扮嘢又好當應節又好，帶老竇食番餐既矜貴又實際嘅愛「參」宴，陪老竇一齊嚐盡甜酸苦辣，笑住兼捧住個肚過節喇。
記者：黃若茵
攝影：黃子偉、周旭文、陳盛臣
模特兒：寶哥、翠瑩、Crystal、Samantha（Salvador）
爸爸吃得甘「參」
參，哪有不甘？入口先苦澀後甘甜，正是已為人父嘅總廚馮師傅切身感受。佢係一家之主，兩個仔𠵱家十幾歲：「記得啱啱學人做老竇嗰陣，日日為個仔安排一切，好大壓力，𠵱家見到佢哋牛高馬大，個心甜晒。大仔8歲嗰年，仲親手整咗張心意卡畀我，雖然簡單不過好感動，因為咁多年嚟都係我同我老竇慶祝父親節，嗰次係第一次以老竇身份慶祝。」既有養兒育女嚐盡甜酸苦辣嘅親身體驗，馮師傅費煞心思設計出嚟嘅「愛蔘宴」一定好味，我話嘅！
一般嘅所謂父親節套餐多數呃錢，喺餐牌求其揀幾個平常菜式，左拼右湊老作個懶有愛心嘅菜名就話係父親節套餐，食咗都背脊骨落！「愛蔘宴」個名聽落都好花巧，不過就一啲都無揸流灘，9道菜分別用海參、高麗人參、關東遼參、參茸、黨參、原條鮮人參及沙參配其他食材入饌，拼出一餐滋補晚宴，帶老竇嚟喫番餐一啲唔失禮。
涼拌海參拼海蜇頭
選海參做頭盤，貪其肉質厚味道較清淡，師傅話記得點辣醬調味，味道更佳，食海蜇頭宜蘸用香醋調校出來的酸汁，好醒胃。
高麗人參餃
與其說苦，不如說甘，精緻蝦餃上放兩塊參片，入口慢慢嚼出人參的濃烈甘味，其軟韌跟蝦餃的彈牙口感相撞，好有趣。
人參果桂花糕
人參跟桂花本身味濃，兩者混在一起卻沒有蓋過對方的香味，且桂花份量比市面一般桂花糕多，吃起來特別清甜。
北芪黨參汽鍋雞
汽鍋雞的湯味頗為濃郁，雞湯流入喉嚨才漸漸散發北芪黨參的甘香，誇張一句，吃完齒頰留香呀。
關東遼參扣鵝掌皇
遼參賣相好醜樣，不過肉質超爽口，入口超彈牙，其清淡味道，剛好平衡到多汁鵝掌的膩口感。
愛蔘宴（6位$1,928，12位$3,928）
搵食攻略
紅軒（22866868）
地址：赤鱲角香港國際機場暢達路9號富豪機場酒店1樓
營業時間：星期一至五11:00am-11:00pm，星期六、日及公眾假期9:00am-11:00pm
交通：赤鱲角香港國際機場5樓行人天橋步行3分鐘直達，惠顧滿$350或以上，可獲2小時免費泊車優惠
座位：226個，另設1間6人及1間12人廂房，想吃得私隱點，早早訂房
人均消費：午餐$130、晚餐$250
有着數：持富豪機場酒店貴賓卡有7折優惠
Hea住食勁長自助餐
劑劑食自助餐都怕蝕本，誓要喺最短時間狂食，父親節請食自助餐無理由叫老竇食到趕頭趕命。「OneBar」喺父親節特設5個半小時悠長午市自助餐，每位$150全場美食不停添加，一家人相聚聊天Hea住吃，唔怕時間短，只怕你飽到食唔落。
生蠔：
睇住師傅喺廚房攞出嚟，非常新鮮，肉質豐富。
酸甜冷麵：
店員極力推介，模特兒試過讚不絕口，酸咪咪好開胃。
中東飯炒蜆：
中東飯細細粒，超爽！蜆唔會見殼唔見肉，大大隻好鮮味。
扒燒八爪魚：
燒過的八爪魚超惹味，咬落好彈牙。
自助餐（成人每位$150，小童每位$75）
搵食攻略
OneBar（25222246）
地址：中環干諾道中8號交易廣場1期3樓
營業時間：星期一至五12:00nn-10:30pm，星期六、日12:00nn-5:30pm
交通：中環地鐵站A出口
座位：220個，坐近餐枱位有着數，方便師傅一搬生蠔上枱，即搶
人均消費：$150-$300
有着數：渣打信用卡簽賬或持有VIP卡可獲9折，當日每位父親將免費獲贈英國1杯Stella生啤
