昨日攤開報紙，睇到兩段新聞，一段係瑞安房地產上市觸礁，另一段係公民黨一士諤諤反添馬艦建政府總部。呢兩件事表面上並不相干，但八方睇完得出一個結論──羅康瑞好黑仔。
香港股市由年初炒到五月，中國概念發晒癲，好似隻中國銀行，竟然有成95萬人去認購，真係只要你肯印股票，就大把人爭住要。有邊個估到，全中國出晒名嘅上海新天地，加埋「重慶天地」、「武漢天地」、「杭州西湖天地」等一齊嚟上市，可謂全國最優質嘅地產股，竟然要喺截飛前一日宣布擱置上市計劃。除咗三大保薦人滙豐、德意志、摩根冇癮，大老闆羅康瑞更加冇面見阿哥。
一千萬研究費倒落海
添馬艦興建政府總部，現在已經成為煲呔政府嘅頭等大事，總之不惜一切、誓要上馬。咁喺鬍鬚仔曾俊華出盡法寶之後，民主黨已經跪低咗，政府夠晒票過立法會。但係公民黨班大狀仔都要堅持，反對政府浪費納稅人幾百億（地價加建築費）去為一個人製造功績，搞到煲呔好無癮。而無癮嘅仲有一個人，就係羅康瑞。
大家記得呢幅地王回歸以來，政府一時話拍賣、一時又話自己起總部。在2002年，卒之拍板話要起政府總部，藉口係振興經濟。當時仲做埋第一階段預審工作，羅康瑞間大寶號瑞安都有入標，動員大量人力物力去準備項目設計同前期研究工作，點知沙士之後，政府一聲話基於財政狀況又唔起（唔通沙士之後唔使振興經濟？）結果羅康瑞一千萬元前期費用，就咁倒晒落添馬艦前面個海度。而幅地皮，就用嚟搞巨星匯，蝕多納稅人一筆，亦害到米高鼠盧維思捱足三年零八個月。
煲呔要「強政」唔信邪
添馬艦呢幅地王，大抵個名（添馬艦係英軍戰艦，沉咗喺維港）太有煞氣，所以是非特多，邊個掂親都死。煲呔今次唔信邪，皆因喺政改落空、西九蝦碌之後，佢如果連競選時呢個承諾都香埋，實在太唔強政喇。
於是唔止要起，仲要大家一齊支持佢起，多一票反對都係冒犯大王。咁冇所謂嘅，人人睇見你咁緊張，咪玩吓囉。唔知羅康瑞喺瑞安總部樓頭遙望呢幅地王，有冇諗吓上海地產業務上唔到市，不如再次入標，投番單工程做吓呢？
傳真︰2623-9278
電郵︰[email protected]