呢期興霍金，煲呔都唔執輸，喺管治中實施黑洞理論──即係成個政府乜都唔使做，得個窿。唔係講笑㗎，好多政界中人都偷偷哋話，為咗避免有乜依郁，隨時整多幾十萬人上街，煲呔政府喺7．1前，都唔會推新嘢，連舊嘢都係可以唔講就唔講，費事畀機會民主派有話題可講。
八方唔係亂噏，事關香港最高決策機關行政會議，最近三星期都喺放大假狀態，唔知同肥龍去咗日本聽歌劇，冇提交議程有冇關係，抑或煲呔費事做多錯多。行會議員成個月冇會開，掛個名就輕輕鬆鬆袋成六萬幾蚊人工，真係發達咯。
講開黑洞，原來噚日田少都有專程去科大聽霍金演講，佢話大學時讀物理化學，應該有啲底，可以聽得明。佢仲笑煲呔今日見霍金之時，一定好想當面向佢討教黑洞理論，問佢點樣先可以將所有反對派通通掉晒入去，等一眾公民黨成員如湯大狀、余若薇等人，以致各方投訴，唔使再做頂心杉，阻頭阻勢。
如果霍金真係答到，煲呔真係要頒個金英勇勳章畀佢先得，而田少咁知煲呔心意，應該都值畀個局長佢做吓啩！
傳真︰2623-9278
電郵︰[email protected]