鏞記傳人甘大公子寫咗一本書，叫做《鏞樓甘饌錄》，每本售八十八元。朋友兼熟客則獲贈一本。翻開一睇，甘公子文筆原來好掂，好過左丁山多多聲，寫食經與蔡瀾、唯靈、薛興國不遑多讓，兼且配上彩色圖片，印刷精美，於是左丁山睇完甘公子點樣寫「四寶粉妙方濟眾生」（第一一八至一一九頁），再望吓四張四寶圖片，完全明白晒。以後大家出版食經，當以呢本《鏞樓甘饌錄》為比較標準。
何謂「四寶」？乃係丹參、野生洋參、霍山石斛、雲南田七。四寶粉為自四寶中各取四両，合共一斤，磨成幼粉，甘公子每早晚各服一茶匙半（五克），以開水沖服。據甘公子話，因職業關係，日日食好嘢，朝晚食個不停，於是產生嚴重後遺症，就係膽固醇超高及血脂凝聚。幸得好友教路，日服「四寶粉」兩次，果然日漸見效，搵醫生驗過，膽固醇已回復正常，繼續日食夜食，一於冇有怕。
價錢貴唔貴？上述一斤粉分量，約二千五百元左右，可服用四個月，平均每個月六百零蚊。此四寶為中草藥，「四寶粉」藥性平和，無副作用喎。大家見到甘大公子面色紅潤，身段適中，冇肚腩（可比較另一位廚神滔哥之巨型肚腩），唔通此乃四寶粉之功？
除咗考究廚藝，精研洋酒之外，甘公子師承書法家區建公，對書法甚有心得，凡寫書法，當然留意錯別字，佢話鏞記精品之一係「溏心皮蛋」，唔係「糖心皮蛋」。溏心係形容蛋心呈不凝結狀，而非蛋心甜如糖；「紅燒包翅」唔係「紅燒鮑翅」，鮑係鮑魚，與包翅不同，包翅一般採用鯊魚脊鰭，加工後，魚翅成品原梳如包狀，故稱包翅。一道菜除非兼有魚翅與鮑魚，不能稱之為鮑翅。此外，「叉燒包」不是「叉燒飽」。叉燒包外形為包狀，以叉燒為餡，故稱叉燒包。飽係「食包包食飽」嘅飽，與包不同，不可混淆。睇呢本甘公子食經，學埋錯別字兼讀音，（例如滒音窩，煎蛋不會過熟曰滒蛋，滒，多汁也），認真爽神。