香港馬路一到周末日就勁多「SundayDriver」，但原來喺廚房都有「SundayChef」，好似Samuel咁，平日就試盡老婆手勢，一到周末日就俾老婆大人Joko享個小清福，入廚煮幾味，除咗佢老婆，阿仔丁丁都有口福，就算佢只係得2隻門牙，好食唔好食，佢一聞就有表情……唔通佢先係新一代食神？
記者：謝翠玲
攝影：譚盈傑
示範：上環讀者Samuel
大蝦檸檬天使麵 檸味清新
聞煮價：$802人
需時：15分鐘
Samuel跟Joko兩人都是海鮮狂迷，每次去泰國都會大啖海鮮，而啖啖肉厚膏香的大虎蝦當然也是他們的至愛。Samuel每次只是簡單的用橄欖油煎蝦，都會引得坐在客廳的Joko大叫「好香！」得到老婆讚賞，當然煮得特別落力，不過丁丁就……
材料
天使麵200克、意大利芫荽1束、檸檬半個、大虎蝦2隻、橄欖油3湯匙、鹽、黑胡椒各少許
簡易法
1.天使麵按包裝指示時間煮熟，隔水。芫荽切碎，檸檬榨汁，削出黃色果皮，剁碎；
2.虎蝦背部切至1/2吋深，挑腸，留殼，用橄欖油煎熟；
3.將煎蝦油、芫荽、檸汁和檸皮跟天使麵拌勻，加入鹽和黑胡椒調味即成。
貼士
檸皮味道清香，但只限黃色部份，白色部份則味帶苦澀，使用時要留意。
白酒煮青口 煮到開口熄火
聞煮價：$902人
需時：15分鐘
白酒煮青口是Samuel夫妻食譜中一個重要菜式，皆因兩人由拍拖到結婚，都特別喜歡到銅鑼灣一間餐廳撐枱腳，而且每次他們都必點這個菜式，甚至問埋餐廳大廚點煮，可謂到了百吃不厭的地步，可能係遺傳，烹煮時丁丁全程目不離開碟青口。
材料
青口300克、意大利芫荽2束、乾葱1粒、蒜頭1瓣、牛油1湯匙、白酒3杯、忌廉1杯、鹽少許
簡易法
1.青口外殼用刷子洗刷乾淨，芫荽切碎，乾葱切片，蒜頭剁碎備用；
2.以牛油起鑊，爆香乾葱片、蒜茸和青口；
3.加入白酒，以大火煮滾至青口打開殼，加入忌廉和芫荽碎略炒，以鹽調味即可。
貼士
青口煮過久會變韌，一煮至打開口便要熄火才能保持肉質嫩滑。
雜菜蒸焗銀鱈魚 浸有白酒香
聞煮價：$552人
需時：15分鐘
平日Samuel都會煎銀鱈魚，不過今日見大蝦已香煎，為免老婆大人吃太多煎炸嘢會熱氣，特別改用蔬菜、白酒來蒸焗，肉質唔嚡口之餘，更帶有絲絲蔬菜和白酒甜香。
材料
銀鱈魚120克、鹽、白胡椒粉各少許、番茄1個、洋葱半個、甘笋半條、白酒2杯、牛油1湯匙、麵粉1湯匙、黑胡椒少許
簡易法
1.銀鱈魚以鹽和白胡椒粉略醃。番茄、洋葱和甘笋切條後墊於深碟中，放上魚，倒入白酒；
2.由水滾開始計，隔水蒸魚7分鐘或至熟。把蔬菜和魚以另一碟盛起；
3.蒸魚剩下的湯汁加入牛油煮滾，邊拌入以少許水開勻的麵粉芡煮至稠身，用鹽和黑胡椒調味，把醬汁淋在魚上。
貼士
如果想醬汁更濃郁，可以將蒸魚剩下的湯汁和蔬菜用攪拌機攪成茸再回鑊煮滾，蔬菜清甜味會更突出。
忌廉菠菜湯 阿B都啱飲
聞煮價：$253人
需時：12分鐘
Joko最愛飲Samuel親手煮的菠菜湯，因為這是某年情人節Samuel特別為她而煮的愛心菜，份外有紀念價值。今次更預備給只有牙仔兩大隻的B仔丁丁試食，初時都好抗拒，但最後都飲咗半樽（奶樽）。
材料
菠菜半斤、水半杯、清雞湯500毫升、忌廉1杯、鹽少許
簡易法
1.菠菜洗淨，只留菜葉略切碎，連清水加入攪拌機中攪成茸；
2.清雞湯煮滾，加入忌廉同滾；
3.待湯再次滾起，加入菠菜茸滾1分鐘即熄火，加鹽調味。
貼士
如沒有攪拌機，可以用刀將菠菜剁成茸，但剁成茸後不可煮過久，否則容易變黃。
周日大廚Samuel
Samuel比太太Joko更愛下廚，一到周末日，他便會跑到超市買來一袋二袋的新鮮菜蔬魚肉，親自為愛妻同丁丁煮兩味。就憑着他的好手勢，一次又一次的冧盡太太，最耍家煮西菜……使唔使咁恩愛呀？
