陽光房產及瑞安房地產先後宣布擱置上市計劃，不過世茂房地產（813）據聞仍照原定計劃上市。
有芬佬話，內地房地產業務的前景確係唔多好，又有對沖基金減磅迹象，不過就算個市幾差都好，只要唔係世界末日，垃圾都有個價錢，只要訂價吸引，點解唔可以繼續上市？
今次世茂房產每股招股價介乎6.25-8.50元，較每股資產淨值折讓25-43%，若定價在6.25元其實相當吸引。由於今次集資額唔細，介乎37.20-50.60億元，認購反應與上市首日表現估計唔會好，破底機會相當大。
噚日內地房產股造好，其中獲大股東增持的合生創展（754）曾大升18.64%至17.50元，但其後市場傳出中央可能加大房地產的調控力度，升幅才收窄，最後升6.1%，收報15.65元。i師傅話，中央話明要宏調，炒家仲夠膽炒內地房產股，即係擺明同中央對着幹，當中央的政策冇到，隨時引來中央再出手干預。
奇峰要幾多有幾多
新股奇峰化纖（549）招股，據聞勉強足額認購，大戶在配售部份認購，幾乎是百分百中晒，即係要幾多有幾多，唔知上市要掟番幾多貨出街呢？奇峰是次招股總數2.36億股H股，90%配售，10%公開發售，招股價介乎1.69-2.12元。
萬威（167）噚日停牌，話要供股集資。萬威曾經係基金愛股，其業務與偉易達（303）近似，都係產銷數碼產品及電子教育玩具，不過近年進行業務重組，兼要在歐洲新法例限期屆滿前清理一些不符規定的存貨，搞到3月底止年度業績虧損2.64億元。當時大市不斷上升，萬威股價就不斷下跌，實在令股東傷心。
現在研究萬威的證券行只得三數間，好難問基金要貨，加上股價低至0.48元，與其賤價配股不如向股東伸手。
阿虎