現時嘅地產代理唔可以淨得把口，好多代理行以至買賣雙方，都會要求班前線經紀，對個樓市、買賣流程同法律知識滾瓜爛熟。因此，美聯專門搞培訓嘅部門，近排整咗個「土地查冊地區性培訓」巡迴課程，由導師親自落區，向員工提供土地查冊培訓，最近一次喺屯門大興分行舉行，當日咁啱係黑色暴雨，同區其他分行都有同事冒雨而來，即場仲有唔少人提出一啲實際運作上嘅疑難。
至於咩嘢叫做土地查冊？簡單咁講，就係由經紀向土地註冊處，查詢某一個單位嘅樓契資料，內容包括所有買賣詳情、法律文件事項、樓宇按揭資料等等，主要係提供畀買家，作為落決定前嘅必備參考資訊。