呢期好多小型基金股急跌，小初問經紀黃係咪基金全面睇淡。經紀黃話，原因唔一定係芬佬轉view睇淡，而係因為市況麻麻要減磅，好多時睇到隻股賬面仲有得賺，就要沽貨套現先。
經紀黃又話，例如上市以來一直炒到飛起的安瑞科控股（8289），昨日就一度急跌至3.50元，收4元，仍跌9.09％。安瑞科去年上市後股價一直上升，由最低的1.70元升至最高5.50元。有芬佬食糊，其實好正常，就算昨日急跌，股價仍比低位高好多。
由於安瑞科係創業板股，流通量較細，所以沽盤稍為大啲都好容易嚇親街坊。5月初時，有個上市前投資者以4.60元沽咗批貨畀其他芬佬，當時要咗貨嘅芬佬，昨日見到咁情況，難免唔開心。
但正所謂人棄我取，例如中國水務（855）早排亦由2.45元高位，直插至最低的1.47元，情況亦相當驚人，但低位時一直有芬佬趁機增持，仲買到8％以上。
中國水務昨日升6.67％，收1.60元。
慕容小初