世界盃個個想睇，不過唔係人人有米親臨現場，身家豐厚嘅田少就梗係冇問題啦，佢足足用咗至少十幾萬（因為佢話一場波大概三千歐羅，即係約三萬港元，而佢就足足買咗四場飛），享受現場睇波嘅樂趣；唔夠叠水嘅八方，梗係只能羨慕啦。
今次田少嘅世界盃之旅只有一個旅伴，就係佢個囝囝；田太罕有唔跟隊，睇怕都因為佢唔係球迷。田少買嗰四場波，係四強戰加季軍同決賽（唔怪得咁鬼貴啦！）場場都喺唔同城市嘅球場舉行，所以佢都好奔波，三號先去多蒙特，之後就轉飛慕尼黑、斯圖加特同柏林。
不過，田少此行隨時面對要瞓街嘅危機，因為德國啲酒店一早book到爆晒，佢都係千辛萬苦先訂到房，仲要好多時都同個球場有成個鐘車程，佢自己都笑笑口話，真係差啲要瞓街。
無論幾高興，田少一定要喺十一號前飛返香港，同自由黨黨團開會，睇吓立法會十二號休會前last個會，啲議案點投法，如果差嗰一票過唔到，煲呔又嬲佢㗎喇。
傳真︰2623-9278
電郵︰[email protected]