韓Phone玩熱感　㩒掣認指唔認人

天時暑熱，得閒游吓水或者嗒番支甜筒不知幾爽！但係，有手機廠商竟然推出一款專針對熱能感應嘅機種，講明遇熱先至玩到，相當頂癮！講緊嘅就係呢部SAMSUNGE900，繼早前LGKG800以「熱感應觸控功能鍵」成功上位之後，三星再接再厲，並加碼玩大相機兼插卡分唇，提升影音質素；配用極型黑色機身，以後去到沙灘，唔使再同陽光玩遊戲！

記者：陳國輝　攝影：黃子偉　
ImageGirl：Renee（LB）

韓Phone似乎特別鍾意巧立名目，記得好耐之前，PANTECH已推出過一款指紋感應手機，用法類似智能身份證過關，只認指紋唔認人；及後SAMSUNG又再推出一款搖搖樂手機，需要Fing住嚟揀歌，仲內置骰仔遊戲，總之夠晒騎呢！KG800及E900趁炎炎夏日大玩熱感，雖然未知實唔實用，但起碼必成話題之一，連Sales都話呢幾日特別多人查詢，唔到你唔信！

■輕按上下掣就見到子目錄內容，方便瀏覽。

■內置兩款JAVA遊戲，娛樂性僅屬一般。

熱感掣勁好Feel

同LG部朱古力手機KG800比，E900簡直似得交關！黑𤷪𤷪滑蓋不在話下，更抵死連機面嘅布局亦差唔多！不過E900就將4方向熱感掣換為音樂播放及選曲，一般Menu亦玩上呢項功能。實地試過，E900個熱感掣相當之敏感，輕輕力都感應到，而且準確度夠高，唔會錯手㩒咗另一樣Function。不過要提提你，用指甲「咪」係完全冇反應嘅，女士們可能要適應吓。

■話明係熱感，試過用手指甲㩒掣真係冇反應！

■長度差不多，但係E900就上下收身，明顯冇咁似朱古力。

韓機互抄8成似

■KG800稍為薄身，加埋一條銀邊感覺仲型啲！

■鏡頭位同樣擺放喺趟蓋背面，機身滑出先見到。

升級玩200萬像插卡

玩得LG朱古力，主要係基於外形上嘅突破，若要真正試齊所有分唇，E900絕對勝一籌。以影音功能計，KG800只配備平民裝130萬像素相機，但係E900已提升至200萬像素；另外，雖然KG800內置音樂播放器，但不設記憶卡位，手機只得128MB容量，要就住用相當辛苦；相反，E900就備有T-Flash卡槽，想輕輕鬆鬆抄幾百首歌，真係話咁易！