選舉事務處噚日公布選舉委員會臨時選民登記冊，原來今年有成220,291人登記咗，比上年嘅202,243人，足足多咗成萬八人，當中又以中醫界增幅最勁，有成4.2萬人，比上年升近六成；高等教育界同會計界都唔差，登記人分別上升兩成四同一成七，應該都係泛民積極動員登記有功。
之不過，多咗選民登記，都唔代表佢哋可以搵夠100票派人選特首，因為當中好多選民，都係政府老友記；佢哋一個人仲可以用唔同公司手持成十幾票，都幾唔公平㗎。
逾30票喺手上
好似李超人咁，佢自己喺地產界係選民當然冇問題，但原來佢嘅長和系公司，單單喺商界（二）組別，就有成15間公司登記；計埋小小超喺IT界自己一票，以及PCCW嘅八間公司登記、和記集團嘅五間登記公司，又攞多十幾票喇。大仔小超喺政協又有一票，嘩，成個李氏家族可能有成30票，隨時可以支配特首選舉喎。
當然，唔止李氏家族好多票，郭氏三兄弟連同佢哋嘅新鴻基集團，都有10票左右；新世界都有幾票，總之都係多過人啦。
除咗地產商外，好多高官都係選民，仁龍仔喺法律界，亞瑟王李國章同周一嶽就喺醫學界；肥平同老董則係政協嘅登記選民。最特別係煲呔乖仔曾慶衍都係醫學界選民，唔知會唔會投返老竇一票？
傳真︰2623-9278
電郵︰[email protected]