孫柏文每日返工嘅地方，有位女同事叫做Winery，佢肌膚亮白晶瑩剔透。雖然我完全相信佢話冇用SK-II，不過每一次望佢，我都覺得佢可能係我哋特區僅有嘅女X-men（變種特工）。而佢有嘅「X-Factor」基因，就係一個令到佢汗水含有高濃度Pitera嘅基因，所以每秒每刻都喺度做緊facial，最終也令到佢肌膚亮白。
佢不但有雪白嘅肌膚，人靚聲甜，仲要有一份自然流露嘅幽默感。從幽默感角度來講，佢嗰隻絕對唔係「香港高登」（hkgolden.com）網站啲網友常常掛喺嘴邊嗰隻「港女幽默」。最厲害嘅地方，就係佢對世事嘅觸覺非常敏銳而且分析力強，我每次有幸聽到佢批判世事，都有點莫名的興奮。
唔珍惜獨家轉播權
大家可能會問：「孫柏文，點解你今日無端端講靚女？係唔係又想呃稿費？」其實，今日我係想同大家分享一件煩擾着Winery嘅事。因為我相信呢件事都可能影響你。大家都知道呢排全球人民，都將注意力放在世界盃之上，我哋特區人民都一樣。當然，體育比賽這件事，最好就係睇現場直播。而因為我哋特區崇尚自由經濟、尊重知識產權、尊重私有財產，所以不單止欣欣向榮，仲要搞到淨係得收費電視先至可以睇世界盃。
前日，孫柏文就用隻金手指，為啲似我咁樣──有線電視嘅電線未鋪到屋企嘅fan屎，篤咗個喺互聯網免費睇世界盃嘅方法。就係去到ppstream.com嘅網站，去下載佢哋嘅軟件，然後開啓，跟住就選擇中央電視台第五台或者廣東體育台，就可以睇到世界盃。
大家可能會再加問：「咁Winery煩緊啲乜？」首先要知道Winery係一個抱打不平嘅女中豪傑，特別對於有問題嘅商業決定，佢更加會作出建議，希望該公司有改進。
NowTV嘅Richardinho
前日下午，Winery好畀面咁睇完我教大家點樣喺互聯網免費睇世界盃之後，佢就同我講：「孫柏文你一定要用隻金手指去篤醒有線電視，佢哋𠵱家幫自己倒緊米。有線電視用高價去買世界杯轉播權，都係希望大家會買有線電視嘅收費電視服務。不過，我就有一個非常之唔好嘅經驗。世界盃開鑼之前，我被有線電視企街嘅sales截住，佢話有3個月『睇世界盃』套餐，我聽到當然有興趣。雖然3個月套餐每個月收費都比較高昂，不過都預咗，所以無所謂。最弊，個sales話如果訂3個月套餐，要到6月27日先至可以安裝，咁樣連世界盃都踢完，我訂來做乜？仲有，最好笑就係個sales話如果肯簽18個月約，就保證可以喺世界盃開波之前安裝好。咁樣仲唔係幫自己倒緊米？NowTV就好唔同！」
我問：「Richardinho？」
Winery：「係囉，原本我都係貪佢夠平，諗住用幾十蚊睇NowTV，點知愈睇愈多台。仲有，俾佢入屋之後，我就慢慢、慢慢咁開始乜都用晒佢，所以你唔好話佢唔得。」聽完之後，雖然我仲相信下一屆世界盃冇理由仲有人用高價去買獨家轉播權返嚟，我都希望有線電視好好檢討自己嘅商業決定。
孫柏文