菠蘿文：今日又有第2輪嘅分組賽，瑞典對巴拉圭應該又可以開「細」。
侍仔：我估都會啦，巴拉圭嘅踢法好悶，上次落後英格蘭0:1仲經常大腳吊前，但又無人接應，加上今場守和瑞典，最尾1場贏千里達都可以夠分出線，伸唔悶和你？
吹水傑：乜英格蘭出硬線㗎？千里達可以再守死佢嘅啫，加上大家波路太似啦，更利於千里達做防守。你見上次英格蘭係咁轟都轟唔入，就知道呢隊波有問題啦。
菠蘿文：乜係你呀吹水傑，講嘢好似好獨到咁喎，哈哈！
吹水傑：你估我流㗎，話晒當年我係英甲第一中堅喎！
侍仔：係呀，踢英甲咁勁，你咪係張子岱第2？你嗰陣踢邊隊呀，黑池定韋甘比？
菠蘿文：你聽佢亂噏啦踢英甲，英花書院甲組足球隊呀。佢頭球好勁㗎，冇人mark都要頂出界，夠晒穩陣，哈！
吹水傑：車！我由得你笑，總之今晚我好有靈感英格蘭開個和，再串埋瑞典「細」。
菠蘿文：瑞典嗰場我就唔揀嚟串啦，哥斯達黎加嘅下盤都係一個好選擇，佢同厄瓜多爾都係兄弟波，哥斯達黎加今次對番同級球隊，應該可以有正常嘅發揮，博個下盤。
吹水傑：你成日都話博下盤，但有幾多場開下盤㗎？唔好成日畀啲「山埃」人啦，侍仔俾你害到面都青埋啦。
侍仔：我自己眼瞓啫，𠵱家每晚收工都要睇埋12點嗰場先瞓，第2日6點返工，真係不在狀態。
菠蘿文：咁你要自己揀波嚟睇啦。
高洛文