近日除咗睇世盃賽事外，梗係有做女仔最鍾意嘅運動啦！係乜嘢？就係shopping喇！德國世盃期間有好趣怪嘅產品，有平有貴。好似H&M呢間歐洲聞名嘅時裝店，入面嘅產品價錢合理，我細個喺德國住時，已經好鍾意去呢度買嘢。
而且裏面又有世盃比堅尼賣，將參賽國家嘅國旗印上去，當做一種design，感覺幾新鮮得意；店主話呢類比堅尼喺世界盃期間會有8折優惠。咁梗係啦！世界盃過咗都唔會有好多人買啦！至於食方面都要迎合世盃，超市賣嘅飲品都印上球星肖像，但就清一色德國球員；而有一種波形嘅可樂樽，圓碌碌幾趣致。
平嘅有超市食物同比堅尼，貴就當然係首飾。行過一間時裝店，入面一個鑲有鑽石嘅LV足球吊墜，大家估吓幾多錢？盛惠7000歐元，即係6萬8千幾港幣！
袁彩雲
無綫世界盃直擊主持