早排台灣已傳出小豬（羅志祥）同S.H.E嘅Selina感情出現危機，Selina俾人踢爆同黃子佼約會之外，佼佼日前又喺網上抨擊小豬唔陪女友，又唔畀佢同人約會係好唔啱，點知日前又有讀者報料話佼佼買咗架寶馬新車，車牌係「1031」，同Selina生日日期一樣。
小豬唔專一
另外，讀者又報料話小豬唔係受害者，因為佢經常同ENERGY成員去唱K𠝹女，一啲都唔專一，所以佢同女友先會分手。難怪佼佼追佢女友咁快得手，不過噚日佼佼只肯認車牌號碼係同Selina生日日期一樣，但就唔肯認拍拖，佢透過經理人解釋話：「真的是巧合，拿到車牌沒有發現同號，是經過她提醒才知道，我們真的沒有指定號碼。我發誓，他們現在真的沒有在一起。」
此外，小豬同大S（徐熙媛）𠵱家趕緊拍新戲《轉角*遇到愛》，小豬同Selina感情備受考驗，但大S同仔仔（周渝民）就甜到漏，上個星期五仔仔25歲生日，佢話想食胡椒餅啫，大S就即刻打孖送上，真係體貼啦。
