每年6、7月都係蓮藕當造之時，其花清雅，根滋補，生藕清熱消瘀，熟藕補脾胃、養胃、滋陰，真係無得彈咁完美。生藕就唔使多教大家點食，熟藕就有以下4式煮法，由賢內助Gigi及日航酒店中菜總廚劉師傅合力炮製，食神就梗係仔仔Ryan（同小記）啦！
記者︰劉昱蘭
攝影︰楊錦文
鳴謝︰日航酒店桃李中菜廳（23134225）
天婦羅蓮藕碧綠桂花蚌 炸2分鐘最爽口
價錢︰$60/4人
需時︰20分鐘
蓮藕煲湯見過，炒小菜見過，將佢用天婦羅伴邊就真係新奇，Gigi都係聽師傅學識咁整，最開心就係Ryan，食到飽飽時識得餵番塊畀媽咪食作回禮，抵錫！
材料
天婦羅粉250克、蓮藕片100克、桂花蚌、小棠菜各300克、蒜茸少許
調味：鹽、糖、雞粉、薑汁各少許
簡易法
1.用水把天婦羅粉開成漿狀，蓮藕片沾上天婦羅粉漿後炸脆；
2.桂花蚌調味汆水至熟透，小棠菜煮腍；
3.蒜茸起鑊，加桂花蚌和小棠菜炒香。
貼士︰
蓮藕片炸得太耐就會唔爽口，2分零鐘已經好夠，65-80℃油溫最好，無測溫表可將天婦羅漿彈落啲油度，即刻浮番上面就即係溫度啱啱好。
帶子藕粒菜脯炒蛋白 皮膚滑滑
價錢︰$60/4人
需時︰20分鐘
問Ryan最鍾意食邊碟菜，佢就指住個炒蛋白，Gigi媽咪都點頭同意，Gigi鍾意蛋白夠滑，食完皮膚白滑靚靚，問番Ryan係咪同媽咪一樣咁貪靚？他不語，但就掛住食伴碟嘅士多啤梨！
材料
鹽1/6茶匙、雞粉1/4茶匙、鷹粟粉21/2茶匙、上湯1/3碗、蛋白3隻、鮮奶1/5碗、帶子150克、蓮藕、菜脯各50克
簡易法
1.將鹽、雞粉和鷹粟粉加入上湯、蛋白和鮮奶中拌勻，直至鷹粟粉完全溶掉；
2.把帶子、蓮藕、菜脯汆水、切粒，加至已調味的蛋白鮮奶中；
3.最後用油起鑊，倒入已放料的蛋白鮮奶炒熟即可。
貼士︰
起鑊落油前，要確保隻鑊燒得夠紅，炒嘅時候就唔會咁易黐底。
蟹肉雙蓮羹 蓮子記得要通芯
價錢︰$20/4人
需時︰20分鐘
蓮藕清新，用嚟配海鮮就最啱，劉師傅就揀咗蟹肉，雙蓮就係Gigi最鍾意嘅蓮子，貪佢啱女人調經及白帶過多，照顧Ryan呢隻嘩鬼咁辛苦，蓮子仲可以鎮靜安神，太太口服液都慳番！
材料
蓮藕肉100克、蓮子50克、鮮蟹肉30克、雞蛋1隻、上湯150克、雞粉少許、火腿茸10克
簡易法
1.先將蓮藕切粒，然後把蓮子蒸至軟身，放入攪拌機磨成茸狀；
2.將蓮藕粒、蓮子茸、蟹肉加入上湯，煮至稠身；
3.再把雞蛋白加入稠身的上湯內，加雞粉後撒上火腿茸即成。
貼士︰
蓮子記得要通芯，如果連埋啲芯打茸會好苦，仲有一定要煮得夠腍，唔腍就會變成蓮子粒好嚡口。
海皇蓮藕生菜盞 有酒樓風範
價錢︰$40/4人
需時︰20分鐘
碟餸樣靚飯都會扒多兩啖，好似呢個生菜盞就夠晒精緻，酒樓用嘅馬拉盞喺屋企整就真係攞嚟搞，不如簡簡單單1把剪刀剪4片生菜，都可以整個生菜盞𠱁細路。
材料
西生菜250克、帶子、蝦各80克、西芹、蓮藕各200克、蟹肉、馬蹄各50克、蒜茸、鹽、雞粉各少許、欖仁、紅辣椒各20克
簡易法
1.將西生菜切成4個盞形；把帶子、蝦、西芹、蓮藕、蟹肉和馬蹄切粒汆水；
2.落油和蒜茸起鑊，把已汆水的材料炒香，用鹽及雞粉調味後，放進生菜盞內；
3.將欖仁炸香，然後磨成欖仁末；紅辣椒切粒，最後把紅辣椒粒和欖仁末撒在生菜盞上即成。
貼士︰
所有材料汆好水處理晒後，記得唔好貪方便，一定要索乾水先炒，唔偷懶先會炒到又乾又香嘅正菜。
母子篇：垃圾當糖食
Ryan係個醒目仔，7個月大就已經識叫「媽」。2歲大嘅時候，喺過新年時仲識懶醒搞亂檔，Gigi憶述︰「今年新年我都有整炸蓮藕，不過嗰時無同師傅偷師，可能真係因為啲油唔夠熱，貪快落鑊炸，結果唔夠爽唔成功，炸咗十幾片都丟咗，但個仔唔知點解咁醒，認得糖蓮藕都係咁上下樣，竟然喺垃圾桶裏面執番上嚟畀我，叫我放番入全盒唔好浪費，成班親戚都喺度大笑，但我都忍唔住要讚佢醒。」
