世界盃對好多球迷嚟講，真係一項有十級魔力嘅引誘，幾乎睇少一場都會囉囉攣，所以呢排趕返屋企嘅人都特別多，免得錯過精采賽事。
唔知係咪因為趕住走，大家都火氣猛晒，連立法會噚晚辯論有關社會企業嘅議案，提出原議案嘅自由黨梁劉柔芬唔知做乜好好火，喺總結時點名大鬧王國興，話佢好指自己思維錯亂，簡直係「入我以罪」。
出到啲咁重嘅字眼，王國興都覺得好冇厘頭。查實王國興發言時，都無話佢個議案點點點，對於被鬧佢都好無奈，仲話自己係以事論事，劉太好似小器咗啲咁話喎。
至於另一個關於醉酒駕駛嘅動議辯論，平時閒閒哋都有十幾個人爭住發言啦，但噚日七個議員講完，竟然無人舉手話要講嘞，范太對呢個奇景都好愕然，問多兩次都發現無人要開金口，就交番個波畀原動議人劉江華，結果連埋投票，四十五分鐘就破天荒完成。
劉江華都好無奈咁話，可能大家趕住返去睇世界盃，所以咁重要嘅嘢都比較少人講。八方計過，發言嗰七個議員中，四個係民建聯，兩個自由黨，一個民主黨，公民黨一個都無，唔通民主派真係鍾意睇波多啲，所以個心都唔喺立法會？
傳真︰2623-9278
電郵︰[email protected]