港股噚日仍在牛熊分界線之上浮沉，恒指收報15247，升13點，成交達329.57億元。據聞對沖基金仍未停止沽貨，好似港交所（388）咁，被大手質低5.2%至45.50元收市，成交高達10.4億元。
黑客話，港交所之前獲高盛等大行不斷唱好，話見80元云云，加上有對沖基金入市炒作，股價曾升至65.80元。大行唱好港交所的原因，不外乎內地金融機構來港上市會吸引各地資金來港買賣，QDII實施會刺激港股成交，而港交所擁有壟斷地位，自然受惠。
港交所魅力大減
不過，大市經過近期的大幅調整，已有步向熊市迹象，股份經過大手拋售後，成交通常轉趨淡靜，而投資市場表現欠佳，亦可能拖累港交所的投資收入。除非調整過後大市成交仍能維持在300-400億元水平，否則大戶暫時好難搵藉口再推高港交所。
晶門（2878）噚日虎頭蛇尾，早段升至2.225元，係威係勢，但最後倒跌3.49%，以2.075元全日低位收市，據聞是因為基金繼續減持。
大市噚日曾挾高至近15400水平，或多或少和四大家族入市掃貨傳聞有關，可惜反彈動力仍嫌不足。市傳李嘉誠、郭氏兄弟、李兆基及鄭裕彤入市掃貨，不但買本身公司的股票，更掃期指及買中移動（941）等重磅股。
金屬商品價格大跌，以鋼及銅為主要原材料的德昌電機（179）借勢反彈4.63%至5.65元，成交達6977萬元。但大家唔好忘記，德昌曾經為銅價進行對沖，即係將銅嘅成本鎖定在某個水平，銅價大升大跌都未必關佢事。
不過i師傅話，德昌近年人升佢跌，股價已經跌得好殘，噚日只是略作反彈，唔算好過份。不過，以基本因素看，往績PE28.4倍，股息率僅2.3%，實在唔算吸引。
阿虎