上海姑爺羅康瑞隻瑞安房地產逆市招股，結果反應慘淡，證券行嘅孖展冇人吼。不過，股市吸引之處就係，無論幾淡靜，一樣有人唔信邪以為自己可以「撈底」，甚至帶番旺個市。好似曾經名列福布斯中國首富榜嘅許榮茂，佢隻世茂房地產噚日喺香港做機構投資者推介活動。
為咗「響朵」，許首富一擲100萬蚊，抽咗個靚冧把──813，「發」財兼「實生」，同上海姑爺個「272」比較，許首富小勝一仗。
講番噚日個推介會，喺超五星級嘅中環四季酒店搞，雖然話係逆市招股，但筵開18圍都唔夠坐，要加櫈兼派三文治，有關方面當然係話芬佬對隻股睇好，所以反應踴躍啦，但華華就話，唔知班賓架係咪前晚睇巴西對克羅地亞，落重注買巴西開大，點知輸咗兼捱眼瞓，咪趁世茂房產推介會，蛇出嚟打個轉兼喺四季開餐囉。李潤芳攝