呢幾年好多機構都好興搞啲乜乜排行榜，有關方面又話自己根據甚麼甚麼評審機制選出嚟，所以賽果絕對公平公正。但係好坦白講，有啲賽果真係好難令人信服。
原來除咗娛樂圈之外，球壇都會搞呢啲「花臣」湊吓熱鬧。就好似國際足協之嘛，自從1993年開始，每個月都以排名方式公布全球國家代表隊實力上嘅差距，不過佢哋嘅排名就幾受人非議。好似之前公布美國竟然可以力壓德國、英格蘭、阿根廷呢啲傳統足球強國排第5喎！起初我仲以為自己聽錯㖭！
不過諗深一層，其實呢啲都係數字遊戲啫！爭呢啲虛名嚟有乜鬼用？行動最實際，畀心機喺世盃踢好啲，希望美國喺餘下2場打好啲，塞住班球迷同埋球評家把口仲好啦！
彭浩翔
電影導演