恒指昨日最高15397，升過163點（日股嗰陣大約升240點，埋單則只升90點），但屬於石堅格，收市幾乎冇得升，只有13點進賬。炒C輪難搵食，如果喺最高位時博大市繼續有技術反彈，買熱門恒指C輪，則做即日鮮去到尾已經得番9折。為執條襪帶，未必會累身家，但好易輸對鞋。
好幾隻市值大、PE好高嘅股票，輪流跌，睇樣似係基金套現，最好暫時冚旗，係都要落場，不如細細注揀P輪。
港交所P輪3757：港交所（388）前日跌2.80元，昨日續挫2.50元，有超過10億貨掟出街。港交所往績PE36.1倍，預測25倍左右，未到吸引水平，股價雖然由1個月前高位散落31%，但仍較年初大升42%，基金仲有大把利潤喺手，掟貨冇眼淚，呢兩日沽壓唔輕，短期個勢仲係向下。
搵港交所P輪短炒，市場得兩隻可揀，3757靚過3785。
新地P輪3750：新地（016）有郭老闆增持消息，爬高0.60元，收76.70元。大股東增持，1段時日之後可能證明眼光準確，但市況悽涼之時，股價仲係向下。
搵新地P輪玩短線，揀3750，隻輪10月下旬到期，輪價44仙，溢價4.1%，槓桿率17.4倍（有效7.6倍），引伸波幅25.4%，同類輪中數據最靚。
章盛